一，假如香港仍然係英國殖民地，早就採取特別防疫措施。唔單止對武漢或者湖北，分分鐘對成個由中國嘅到港車船飛機，旅客不論國籍，都會一視同仁；篩檢、強制隔離、拒絕入境及原機船車送返出發地點等，三個級別應變處理措施，全部可以一日之內出到政策。有理由相信，呢類決策港督有權話事，連倫敦批準都唔駛，只要拍個電報畀外交部同內政部，叫做有個通報。
二，之前都有講過，當年英國殖民地政府將公共衛生視為政府重要任務，原因有好幾個。
三，首先，由維多利亞時代開始，受進步主義思想影響，公共衛生同公共教育成為英國文官政府兩大行政功能。就連我呢種自由市場原教旨都要話，香港人或多或少都受過下恩惠，好難唔懷念英殖政府呢兩方面嘅制度建設。
四，其次，自從六七暴動之後，英國政府就更加認真研究點樣加強對香港嘅管治。解密文件揭露，當時嘅策略，係要香港同大陸響民生文化方面，要有明顯嘅分別。英國嘅文官，好自然從公共衛生同公共教育著手；六年免費教育、清潔香港運動，就係呢個時代嘅產物。
五，另一個深受殖民地統治文化影緒嘅城市，新加坡，雖然冇英國政府嘅直接指揮，但都係揀咗類似嘅政策組合。
六，當然，新港兩地最大嘅唔同，係法治。當時香港嘅英資財閥，又或者華人領袖，原則上同殖民地政府關係良好，但司法獨立又可以確保雙方響一個公道嘅遊戲規則下，各取所需，各展所長。另一方面，行政吸納政治，主要嘅政策持份者都響政府體制之內，政策制定同實施有一定共識；唔似家陣咁，要特登培植一班獻世派，儲夠票，自欺欺人咁以為一切盡在掌握之內。
七，至於新加坡，一早就以控制為大前提，所以，嚴格來講真係唔駛旨意同政府可以公平咁打官司，更加唔好以為可以影響到政府。當然董建華想學新加坡，結果呢，香港連新加坡都不如。
八，點解？因為起步點唔同。大家都時光倒流到1960年代嘅話，可能香港都可以好似新加坡咁，又或者澳門咁。1997年嘅香港，已經係一個經濟高度發展嘅社會，你亦唔可以話香港完全無民主自由。甚至乎，除咗普選以外，香港各方面都唔輸蝕比英美德法日等。
九，有睇第一期 First Draft by Simon 既朋友都應該知道，北京嘅「願景」係要用香港同全世民證明，獨裁專政、高度發展同平衝利益係可以並存；甚至乎佢哋認為，呢個係人類歷史嘅出路。即係話，佢哋要否定嘅，係多黨代議政制、自由市場呢個被福山（Francis Fukuyama）稱為「歷史終結」嘅模式。
十，事實話畀我哋知，由1997至今，政府畀人鬧得最多個句係：「無能」。
十一，早幾日響蘋果寫，大陸個套，亦即係香港個套，即係「強政勵治、關愛社會」，大前提係一個所有人都以為「無所不能」嘅政府。換句話講，我哋不斷鬧政府無能，其實係好事。
十二。「#自己香港自己救」好快呢句恐怕都成為「#半港獨主張」。點解，因為呢句說話嘅底蘊反映咗：（一）港府無能亦唔會為港人利益著想（二）北京就更加唔會為香港利益著想。
十三，政治其實有時真係唔好諗得太複雜。人心背向，可以好簡單；只要令人民相信個政府係為人民利益，咁就得。
十四，點解中共同特區政府，咁簡單都做唔到？點解中港矛盾越來越嚴重？
十五，用返今次武漢肺炎做例子；正常政府會做嘅事，中共同特區政府都唔會做，因為佢哋必須用盡一切方法，去證明自己一定可以解決所有問題。喂，你試諗下，中共係唔會承認有問題搞唔掂，因為佢哋唔知道邊件事會令佢哋脆弱嘅 #社會契約 崩潰。
十六，中國大陸嘅社會契約係乜？一，政府乜都搞得掂，大前提係你一定要信政府。二，信中共，總有一日中國人係最威威嘅。
十七，所以，你話呢次唔係中共嘅危機？再搞落去都搞唔掂，仲要令中國人成為全世界不受歡迎人物，你話以中國人嘅性格，仲同唔同你守呢個社會契約？好多人唔相信大陸民眾會反中共，我認為呢個都係一個中共希望世人相信嘅神話，亦都係「無所不能」嘅其中一個面向。
十八，正如之前所講，換咗當年上頭係英國人年代，求其一件 AO，包括自稱好打得嘅林鄭，應該都識得篩檢、強制隔離、拒絕入境及原機船車送返出發地點等三個級別應變。呢啲咁廢嘅措施，來來去去其實都係個幾路，又有幾咁難度？林鄭以及佢屬下港官，充分體現「屁股指揮腦袋」嘅官場法則；佢係依家頭痛緊，點幫上頭證明中國大陸同香港，絕對有能力處理疫情。
十九，不過，現實同理想落差太大，短期，一定係現實完勝理想。中共同特區政府，過去就係咁，不斷被現實反噬打擊。
二十，恐懼同不信任，既係獨裁專政嘅手腕，但亦都係一把兩刃劍。過去三十年，其實都唔少獨裁者倒台，你估中共班人有冇研究過？有，但係好快佢哋一定要自我洗腦，話畀自己知，自己與別不同，唔係啲非洲又或者東歐嘅第三世界。同埋，佢哋好迷信自己有十四億人，大不了，就閉門一家親。
廿一，同埋，香港人不分藍黃，最普遍嘅訴求，肯定係全面禁止大陸人入境。似依家話只係禁去過湖北嘅人，我諗冇乜人會收貨。尤其是已經全國擴散，加埋有好多武漢人封城之前，已經著草去其他地方。你估廣東省冇？我就唔信囉。
廿二，成個制度文化，都係建立響自欺欺人呢四個字上面。比起乜都唔做，更衰就係扮有做但其實係無用。
廿三，北京、上海幾時全面封關？到時，香港睇怕都可能可以提出全面封關嘅，不過肯定太遲。而且去到呢個狀態，恐怕都亂到唔知點收科。你信唔信有人會闖關？你信唔信有人偷渡？你又信唔信到時香港都已經社區爆發，封來都嘥鳩氣？
廿四，依家仍然唔少人，到著病毒全國流竄。就算用目前最保守嘅估計 R0=2.5 ，即係話，每個帶病毒嘅人，都可以傳畀 2.5 個人。中共都唔可以話情況受控。
廿五，補充資料：SARS 嘅 R0 大概係 2 到 5 。天花 R0 就去到 10+ 。即係咁講，正面睇，未去到世界末日，但係假如你不幸受感染⋯⋯呢方面，我真係唔知，更大嘅問題係，其實所謂嘅專家都唔知。我只會講，有人會死，有人會好痛苦。
廿六，就算今次瘟疫大步檻過，中共嘅所謂威信（即係我講嘅神話）亦一定要破滅。即係話，一定要好清楚咁畀全世界，尤其中國人，見到中共其實係無能，更加係為咗自身存在嘅妄顧人命。當年老毛害死幾千萬人嘅歷史，至今仍然係中共嘅忌諱；將所有事情賴落天災同四人幫，以為咁就可以暪天過海。
廿七，【呼籲】大家一定要保命；可以嘅話，避免出街。天氣轉冷，容易起傷風感冒，到時都唔知睇醫生好定唔睇醫生好。
廿八，未來嘅日子，會有更多唔知頭唔知路嘅資訊；真係冇可能 fact check 得晒。大家都係用常識去做判斷（當然，常識呢啲高層次嘢，偏偏係最最最稀缺）。
廿九，最後，個社會再亂，都一定要有人運作。所以，我衷心對所有留守崗位服務大眾嘅人，致上最崇高敬意。（喂，咁你就算封關，都要有人睇住個關啩。冇人送口罩，你戴條毛，食西北風咩？）
